Hələlik bu, yalnız bir ştatda və sınaq rejimində tətbiq edilir.
ABŞ-ın Yuta ştatında süni intellekt vasitəsilə pasiyentlərə reseptli dərmanlar təyin etmək imkanı pilot rejimdə tətbiq olunmağa başlayıb.
Legion Health botuna əsaslanan sınaq sistemi bir il ərzində işləyəcək və pasiyentlərin psixi sağlamlıqla bağlı dərmanlar üçün resept almasına imkan verəcək. Legion abunə əsasında işləyir və ayda 19 ABŞ dolları qarşılığında tibbi məlumatları təhlil edir.
Layihəyə görə, çat-bot yalnız aşağı riskli 15 dərman preparatı üçün resept yazmağa icazə veriləcək və bu, ancaq həmin dərmanların əvvəllər real həkimlər tərəfindən həmin pasiyentə təyin edildiyi hallarda mümkün olacaq. Söhbət fluoksetin, sertralin (daha çox “Zoloft” adı ilə tanınır) və bir neçə digər dərmandan gedir.
Eyni zamanda, dövlət xəstələrdən vəziyyətlərinə nəzarət etmək üçün altı aydan bir həkimə müraciət etmələrini tələb edir. Bot canlı həkim tərəfindən təsdiq edilməmiş başqa dərmanları təyin edə bilməyəcək.
Rəsmilər bunun xərcləri azalda və həkim çatışmazlığını azalda biləcəyinə inanır, lakin sorğuda iştirak edən həkimlər bu sistemin çox riskli və qeyri-şəffaf olduğunu düşünür. Qeyd edilir ki, pasiyentlər artıq həkim nəzarəti altında müalicə kursu keçməlidirlər, odur ki, Legion Health çox faydalı olmayacaq və pasiyentlər müalicə müddətini “həddindən artıq” uzada bilərlər.
Həkimlərin təhlükəsizliklə bağlı narahatlıqları da var: bot müəyyən xəstələrin dərmanlardan əldə edə biləcəyi yan təsirləri aşkarlaya bilməyə bilər və yalnız analizlərə deyil, həm də xəstənin danışığına və üz ifadələrinə əsasən qərar verən canlı həkim qədər effektiv ola bilməz.
Yuta daha əvvəl Doctronic Sİ proqramı ilə birgə ilkin tibbi yardım layihəsi başlatmışdı, lakin bu, qalmaqala səbəb oldu: təhlükəsizlik tədqiqatçıları sistemi peyvəndlə bağlı konspirasiya teoriyaları öyrətmiş və qadağan olunmuş narkotik maddələrin hazırlanması üzrə təlimatları yaymağa öyrətmişdilər. Bu dəfə rəsmilər daha sərt nəzarət təmin edəcəklərini vəd edir, həmçinin ilk 1250 sorğuya real həkimlər tərəfindən nəzarət ediləcəyini bildirirlər.
